Per tot saber sus l'associacion Tot en Òc
que coordena totas las iniciativas de traduccion de logicials e las fa conéisser, clicatz aicí

Un article de Tot en òc.

[modificar] Punt 1

Adissiatz, Se recebètz aquel messatge, aquò vòl dire que siá avètz ja fach saber vòstre interès per nòstre projècte, siá qu'avètz ja participat a la traduccion d'UBUNTU sus Launchad, siá los dos. Aquí un punt sus l'avançament de la creacion d'un associacion, per la traduccion d'espleches electronics e informatics en occitan :http://totenoc.org/wiki/Associacion.

• Una proposicion d'estatuts es ja en linha sul wiki totenoc. I podètz reagir sus la pagina de discussion de l'article.

• Yannig es en possession del nom de domeni totenoc.org. Crearà d'adreças de corrièr electronic pels membres del burèu que seràn elegits. Pel moment, òm utilizarà l'adreça totenoc@gmail.com. Un site internet serà mes en linha, un compte facebook ven d'èsser creat, un sus twitter o autres poiràn èsser creats.

• Ja i a de candidaturas pels pòstes del burèu :
• President : Yannig Marchegay
• Secretari : Cédric Valmary
• Clavaire : Sebastian Pugin
• Lo pòste de vicepresident es estat prepausat a Tòni Gaillard.

Farem un apèl a candidatura per saber se i a de monde mai interessats.

• De corrièrs son estats mandats a Wikimedia France (associacion francesa per Wikipèdia, Wikiccionari, etc), e a Culte e Toulibre (associacions de promocion dels logicials liures) per lor prepausar lo projècte, prene contacte e lor prepausar de collaboracions.

Un proposicion de lòtjament del site internet es facha pel CIRDOC de Besièrs. Yannig es en contacte amb Sr Hammel, lo director, e se devon tornar contactar dins pas longtemps. Ai (Cédric) rendètz-vos diluns amb lo director de l'IEO per estudiar un partenariat. Una demanda d'adesion serà facha a Convergéncia occitana que permetrà l'utilizacion de salas e l'establiment del sèti social a l'Ostal d'Occitània de Tolosa. De lingüistas devon èsser contactats, òm lor poiriá prepausar l'estatut de sòci d'onor (adesion sens escotisson). De contactes devon èsser ligats amb d'associacions omològas dins d'autras lengas.

• De messatges seràn mandats largament per far conéisser lo projècte e prepausar l'adesion. Un comunicat de premsa serà mandat a la premsa occitana. D'entrevistas seràn realizadas a la TV e la ràdio.

• La realizacion d'un lògo es estada demandada a Luce Abérous, grafista occiitanofòna a Tolosa que prepausèt aimablament son ajuda.

• Tre que los estatuts seràn definits e qu'un nombre sufisent de demandadas d'adesion serà estat recebut, una Assemblada Generala Extraordinària per la fondacion de l'Associacion Tot en òc serà convocada. Los estatuts votats en aquela ocasion seràn depausats a la prefectura de la Nauta Garona. Un compte bancari serà dobèrt e un n° de SIRET demandat. L'estatut d'interès general serà demandat a la Tresorariá dels impòstes per que los donators eventuals pòscan dedusir lor don del calcul de l'impòste sul revengut.

• Una associacion avaironesa de promocion dels logicials liures nos contactèt. Voldrián animar amb nosautres un estand a l'Estivada de Rodés.

Aquí ont ne sèm ! Vos tendrem al fial dels avançaments. SVP! S'avètz besonh de precisions o se volètz apondre quicòm, respondètz amb la foncion "Respondre a totes", que siam totes plan assabentatz ! Plan coralament Cedric31 31 de gen 2010 a 10:20 (UTC)

[modificar] Punt 2

Adissiatz a totes, Aquí un punt novèl sus l'avançament de las demarchas per la creacion de nòstra associacion :

• En acamp de burèu de Convergéncia occitana (ne soi salariat), agropament d'associacions que gerís l'Ostal d'Occitània de Tolosa, ai presentat lo projècte. L'autorizacion nos es balhada d'i far adreçar lo corrièr, d'i declarar nòstre sèti social e d'i organizar d'acamps, e en particular, nòstra AG fondadoira. Pus tard, nòstra adesion costarà/costarià 60€/an.

• M'a recebut Jan Morèu, director de l'IEO. La possibilitat nos es prepausada de venir una associacion afiliada a l'IEO. En conservant nòstra autonomia, poiriam profiechar de la fòrça del malhum de l'IEO e de ressorsas en matièra de lingüistica e de difusion.

• Wikimedia France a respondut favorablament a nòstra demanda de rendètz-vos ; i anirem Yannig e ieu. Cal mercejar Tòni per sas presas de contacte l'an passat. Nos avián prepausat de finançar l'estampatge de desplegants de presentacion de la Wikipèdia, del Wikiccionari... en occitan.

• Yannig e Eve (a títol professional, coma emplegada del CIRDOC) se sonaràn dimars que ven per evocar una collaboracion entre Tot en òc e lo CIRDOC.

• Lo compte Facebook compta ja un centenat d'amics aprèp un jorn de preséncia. Comunicarem amb aquelas personas a priori interessadas e prepausarem l'adesion.

• Amb Yannig, pensam qu'un escotisson de 10€ per an poiriá èsser adaptat. Vos sembla bon ?

• Anam preparar un comunicat de premsa per far saber nòstras intencions e far un apèl a adesions. Yannig conselha d'utilizar la foncion "document " de google per lo realizar collectivament. Vau ensajar de veire cossí fonciona... :)

• Tòni m'a confirmat qu'accèpta d'èsser candidat a la vicepresidéncia ! Amb tot çò qu'es capable de far, ne nos podiam pas passar ! ;)

Es tot pel moment ! Portatz-vos plan ! Cedric31 1 de feb 2010 a 10:21 (UTC)

[modificar] Punt 3

Adissiatz, Vos vau recapitular un pauc tot çò qu'avèm fach dempuèi qu'avèm presa la decision de crear l'associacion Tot en òc :

• L'Assemblada Generala Fondadoira de l'associacion se debanarà lo 10 d'abril de 2010 a 14:00 a l'Ostal d'Occitània de Tolosa, 11 carrièra Malcosinat.
• La demanda d'establiment del sèti social a aquela adreça e l'autorizacion d'i far nòstra AG es estada balhada per Convergéncia occitana, regropament d'associacions que gerís aquel centre cultural.
• Una demanda d'afiliacion a l'IEO es estada presentada en Conselh d'Administracion de l'Institut d'Estudis Occitans. La responsa es favorabla ; lo projècte d'estatuts deurà èsser modificat leugièrament per oficializar aquela decision. L'afiliacion al malhum IEO permetrà a Tot en òc de poder beneficiar de lor competéncias e de nos ajudar a comunicar.
• Un corrièr es estat mandat als autors del diccionari Tot en òc per nos assegurar que lo fach qu'aguèssem causit lo meteis nom que l'obratge qu'escriguèron pausava pas de problèmas.
• Un rendètz-vos amb Wikimedia France es previst per la setmana venenta. Nos prepausan d'editar una plaqueta en occitan per presentar la Wikipèdia, lo Wikiccionari... en occitan.
• Lo CIRDOC de Besièrs nos prepausa d'albergar nòstre wiki e nòstres futurs sites internet e de publicar una plaqueta per presentar los logicials en occitan.
• Per anonciar la creacion de l'associacion, un comunicat de premsa serà mandat a La setmana, Occitans !, a France 3, Ràdio Occitània, Ràdio País, Ràdio lengadòc, al sites internet de l'IEO, del CIRDOC, de l'INOC, de Convergéncia occitana...

Plan coralament Cedric31 18 de feb 2010 a 15:31 (UTC)